Տեղ համայնքի հարգելի բնակիչներ.
Խոշորացված Տեղ համայնքի հնգամյա զարգացման ծրագիրը համայնքի կայուն և դինամիկ աճն ապահովող, համակարգված, բազմակողմանի, մանրամասն հանրային քննարկումների և խորհրդակցությունների արդյունքում վեր հանված խնդիրների լուծմանն ուղղված նպատակային և ճշգրիտ քայլերի ամբողջություն է, որը միտված է լինելու միմիայն բարելավելու համյնքի սոցիալ-տնտեսական կյանքը, ճկուն և պարբերաբար թարմացվող ծրագրերի կատարման արդյունքում բարձրացնելով ժողովրդի կենսամակարդակը: Համայնքային ծառայություններն իրենց բնույթով բազմապիսի են, ուստի դրանց կատարմանը որակական փոփոխություն տալու, կատարողական կարգապահությունը ամենաբարձր մակարդակի պահելու համար անհրաժեշտ է մշակել հետևողական և վերահսկման մեխանիզմներ՝ բազմապատկելով բոլորիս ջանքերն ու եռանդը:
Քանի որ համայնքը 2020թ. 44-օրյա պատերազմից հետո դարձել է սահմանամերձ ուստի էլ ավելի եմ կարևորում բոլորիդ կողմից մասնակցային գործընթացը անվտանգության ապահովան և համայնքային ծրագրերի կատարման գործում:
Համայնքի առջև ծառացած խնդիրները, մարտահրավերները և նախկիններից ժառանգաբար փոխանցված խորքային խնդիրներն են հիմք հանդիսացել 2022-2026թթ հնգամյա զարգացման ծրագրի մշակման համար: Ծրագիրը կազմվել է՝ հաշվի առնելով առկա հնարավորությունների և վեր հանված խնդիրների առաջնահերթությունները, որը պետք է հիմք հանդիսանա տարեկան աշխատանքային պլանների և բյուջեի մշակման ու կատարման աշխատանքները կազմակերպելիս: Այն պետք է լինի հնարավորինս ճկուն և պարբերաբար թարմացվող, որը կապահովի եկամուտների լրացուցիչ աղբյուրների հավաքագրում, ֆինանսական միջոցների հայթայթում, համայնքային եկամուտների և տուրքերի արդյունավետ հավաքագրում և նպատակային օգտագործման կազմակերպում: Համայնքի կայուն զարգացումը և խորքային խնդիրների լուծումը հնարավոր է միայն համատեղ ուժերով՝ համախմբելով համայնքի, պետության, միջազգային ծրագրերի, կազմակերպությունների հնարավորությունները:
Հարգե՛լի բնակիչներ, միմիայն բոլորիս կողմից սրտացավ աշխատանքի և համառ մոտեցման շնորհիվ է լինելու այս ծրագրերի կյանքի կոչումը և մեր համայնքի ծաղկեցումը: Համոզված եմ՝ «մեկը բոլորի և բոլորը մեկի» սկզբունքով, միասնական ջանքերով այս հինգ տարիների ընթացքում շենացնելու ենք մեր համայնքը և մեր հաջողությունն ապահովված է լինելու: |