| Նպատակ | Տեղ խոշորացված համայնքի հնգամյա զարգացման ծրագիրը համայնքի կարևորագույն փաստաթուղթն է, որի առաջնային նպատակն է բազմակողմանի ու հանգամանալից քննարկումների արդյունքում վեր հանված համայնքային խնդիրներին տալ լուծումներ` դրանով իսկ բարելավել համայնքում կյանքի որակը: Այն առաջին հերթին ուղղված է համայնքի սոցիալ-տնտեսական վիճակի, համայնքային ծառայությունների որակի բարելավմանը: Ծառայությունները բազմաբնույթ են և դրանց որակական փոփոխության համար անհրաժեշտ է շարունակել մեր հետևողական աշխատանքը, բազմապատկելով ջանքերը և եռանդը: Մեծապես կարևորում եմ մասնակցային գործընթացները համայնքային հիմնախնդիրների վերհանման և քննարկման ժամանակ: Այն հիմնախնդիրները, որոնք արդեն իսկ քննարկվել են տարբեր խմբերում, հիմք են հանդիսացել 2017-21թթ. հնգամյա զարգացման ծրագրի մշակման համար, կարևորվել են դրանց առաջնահերթությունները, գնահատվել են առկա հնարավորությունները: Միաժամանակ պետք է նշեմ, որ ծրագիրը պետք է լինի ճկուն, պարբերաբար վերանայվի և լրամշակվի: Զարգացման հնգամյա ծրագիրը հիմք է հանդիսանալու համայնքի տարեկան ծրագրերի և բյուջեների մշակման և կատարման աշխատանքները կազմակերպելիս: Ելնելով ծրագրի ռազմավարությունից և ընդհանուր նպատակներից, շատ կարևոր է սեփական եկամուտների լրացուցիչ աղբյուրներ գտնելը, ֆինանսական միջոցների արդյունավետ հավաքագրման կազմակերպումն ու նպատակային օգտագործումը: Համայնքի խնդիրների լուծումը հնարավոր է միայն համատեղելով պետության, միջազգային կազմակերպությունների և համայնքի հնարավորությունները: Հարգելի համագյուղացիներ, միայն բոլորիս շահագրգիռ և սրտացավ մոտեցմամբ է հնարավոր լուծել համայնքի խնդիրները: Յուրաքանչյուրիցս է կախված, թե ինչպիսի համայնք կունենանք 5 տարի անց: Վստահ եմ, որ համատեղ աշխատանքի դեպքում մեր հաջողությունը ապահովված է: |